بسم الله الذي نعبده جميعاً
بسم مصر الحرة الابيه
اولاً شكراً الي صديقتي ندي سليم علي ألهامي العنوان . أي هبل في الجبل و أي عربجي على البيتش باجي
ثانياً كل عام ومصر دائماً حرة بيكم .
ثالثاً منذ عام 2009 وانا لم اضف اي جديد الي مدونتي ولم تكن تستهويني الكتابة فيها ولكن بعد ان مر عام علي ثورتنا ولم يحدث اي جديد بل بالعكس وجدت اننا نرجع الي الوراء واحياناً الي الماضي السحيق الي الجاهلية فكان لابد ان اعبر عن افكاري بكل الطرق.
رابعاً ولاني لا احب الكتابة بالفصحي فسامحوني انني ساكتب رسالتي بالعامية المصرية التي اعشقها .
يعني كان لازم المقدمة الطويله العريضة ديه وبالفصحي كمان ؟ اه عشان الناس تعرف اني بعرف اكتب بالنحوي واحسن يصدقوا اني بلطجي (مع اني نفسي يصدقوا نص العنوان التاني ). المهم بطل رغي وقول عايز ايه يا عم ؟ انا عندي تلات رسايل
اول رسالة للمجلس الأعلي للقوات المسلحة.
يا ايها الجنرالات العظماء اصحاب القامات والمكانات (اختشوا عيب) امال لو كنتوا بتحكموا اسرائيل كنتوا عملتوا ايه (الله هو مش نفس الكلام داه كنا بنقوله لمبارك غريبة) لا لا مش قصدي طبعاً اني اقول اننا معملناش حاجة ولا انكم زي مبارك خالص . بس عايز اقلكم اننا حتي ايام مبارك كنا فاهمين اللعب اللي بتتلعب علينا بس كنا ساكتين بمزاجنا لكن للاسف الشعب ابن الذين داه لما بيقوم مش بيقعد بالساهل داه ما بيصدق ولو مش مصدقيني اقروا تاريخ انتوا احرار احنا عمالين ننصحكم وانتم مصرين تعملوا اذكياء علي شعب هو اللي علم العالم ازاي يفكر شعب علم العالم ازاي يثور ومن زمان سيبكم من الثورة الخيبانة بتاعت 25 يناير ديه لسه مخلصتش ولا ثورتكم المشكوك في انها ثورة اصلاً بتاعت يوليو ديه لا بصوا علي التاريخ كويس داه احنا عملنا ثورة من ايام الفراعنة وحكمنا البلد من فرعون حقيقي مش الخيبان مبارك بتاعكم داه فعيب انتوا المفروض كبار وفاهمين اخلصوا وامشوا بالذوق علشان الشعب داه لما بيرخم بيبقي وحش قوي وانتوا عملتوا معاه الغلط لامؤاخذاه وهو مش بيحب كده.
تاني رسالة الي الشعب المصري العظيم.
تحية طيبة وبعد.
مع اني مش عارف لما احب اكلم مصر اتصل بمين غير 140 دليل اللي دايماً مش بترد لكن هاكلمكم وامري لله . علي فكرز انا عمال امدح فيكم من شوية وقلت كلام لوز العنب فياريت تكبرني بقي وتعملوا بيه وسيبكم شوية من الكلام الاهبل بتاع المجلس والعجبة المخرومة والاجندة والتمويل والبلطجية (اه بمناسبة البلطجية مش عيب يا شعب داه انتوا اللي بدعتوا الاصول لما كان بيبقي فيه بلطجي في الشارع بييجي كبير الشارع ويربي اهله بس بالاصول ولو حد قرابله يقله لا داه في حمايتي داه مهما كان ابن المنطقة ولا كان فيه سحل ولا تعرية ولا قلة ادب امال ايه الشماتة اللي بلاقيها في بعض القلة القليلى المندسة في الشعب المصري الاصيل اللي بيقولوا دايماص دول يستاهلوا وانت ساكتلهم يا شعب ما تعرفهم الاصول ) المهم انتوا شعب دكرة وحريمكم ساعات بيبقوا ارجل من الرجالة وانا عارف ان اللي عملتوه مش قليل وواثق فيكم وعارف ان القلة القليلة المندسة علي شعب مصر الاصيل بتاعت (الله يخرب بيوتكم خربتوا البلد ) غصب عنهم برضوا وانا عاذرهم بس ايه هو مش خبطة بالمرزبة ولا ميه بالشاكوش ما تخلصوا بقي من ولاد الهرمة دول يعني انتوا غالبانين فيهم ما احنا ياما ظبطنا حكام قبلهم ولا فرق معانا حاجة ولا حد انا واثق انكم هاتقدروا وواثق ان ربنا اللي مبارككم انتوا في كل الكتب دوناً عن اي شعب خلقوا ربنا (يا ولاد المحظوظة) مش هايسيبكم بس احنا نعمل اللي علينا وانا مستنيكم 25/1/2012.
تالت رسالة ل 2011 .
غوري بلا رجعة ايتها السنة اللعينة وبما اننا في رأس السنة نفسي برجل السنة نرفص اهلك مع اني بحب دايماً ابص لنص الكباية المليان وانتي كان فيكي حاجات حلوة يعني عملنا ثورة خلعنا الريس شيلنا التوقيت الصيفي غيرنا ترددات الدش اكتشفت حبيبتي الخاينة وسيبتها يعني لوز انما داه لو هايتقارن بالبلاوي لا مش هايبقي فيه حاجة مليانة اصلاً . أفكرك . لا هاديكي امثلة .
حادثة كنيسة القديسين
شهداء الثورة
المجلس العسكري
أطفيح امبابة الماريناب
الانفلات الامني
ماسبيرو محمد محمود مجلس الوزراء
الطرف التالت والايد الخفية اللي عايزة قطعها ديه
اتحبست في السجت الحربي
اكتشفت حبيبتي الخاينة وسيبتها
حاجة تاني ولا كفاية . كفاية مش ناقصة هي المهم قولي ل 2012 ان انا مش عايز العن سلسفيل ابوها السنة اللي جاية.
وكل سنة وانتم طيبين
